作為一個香港長大嘅年輕人，講起「東寶怪獸」四隻字正常都會 R 爆頭；但係一提到「哥斯拉」，大家就算未睇過唔知咩樣都起碼會知係咩嚟。其實「東寶怪獸」就係圍繞住哥斯拉電影系列而銜生出嚟嘅一堆怪獸嘅統稱。

哥斯拉系列距初登場至今誕生已有六十五年，除咗衍生出一系列「東寶怪獸」外，其實哥斯拉自身亦有不少演化過程。除咗單純指喺其世界觀中誕生「機械哥斯拉」、「斯拉」等基於哥斯拉而出現嘅怪獸外，哥斯拉系列亦不再局限喺傳統特攝製作層面上。

當中，今日講嘅《哥斯拉：噬星者》就係哥斯拉動畫系列嘅最終章。該系列由 2017 年開始至今一共發佈三部動畫電影，而其故事亦為全新設計，並唔係單純嘅「動畫化」。

雖然故事與前作不一，但其背景亦無太大出入，無非就係「人類終於知道自己嘅力量幾咁渺小」嘅模式。哥斯拉動畫系列嘅故事就係喺二十世紀末，因為世界各地開始出現怪獸，當中包括哥斯拉，人類就開始計劃移民到外太空，亦派咗先頭部隊負責開路，喺外太空四周漂流並找尋合居星球。然而佢哋漂咗廿二年後終需重返地球，並且發現地球時間已經過咗兩萬年，而且地球合居環境已不復存在，唯一一樣嘅就係哥斯拉同其他怪獸仍舊存在，咁呢班人就要對付佢哋呢班怪獸。

而今集《哥斯拉：噬星者》係最終章，重頭戲當然就係哥斯拉同嚟自宇宙嘅巨獸——基多拉互片啦，當然，人類都仲喺度，三方大戰實屬無可避免。

新一代未必接受到舊式東寶電影嘅怪獸片，可能會嫌佢 Low Tech 又難搵嚟睇又性；雖然美國方面荷里活 Keep 住有幫哥斯拉出新電影系列，又拉埋 King Kong 出嚟打，好讓更多受眾認識哥斯拉，但係日本方面派出嘅動畫系列亦不甘示弱，最重要嘅係 Netflix 有，方便又 Legal。

《哥斯拉：噬星者》將喺 1 月 9 日於 Netflix 全球上架，仲有幾日，可以上 Netflix 追返上兩套作品追進度再嚟睇最終章都唔遲。