鍾意某一款車，可能因為N咁多原因，未能夠即時擁有。望梅止渴，搵啲替代品頂住癮可能係唯一舒緩方法，亦有啲case係，真車，佢已經有（甚至同款唔同色都有兩三部），日日對住，晚晚放工之後心思思揸出去「碌個圈」都仲未滿足，返到屋企或喺office都要對到正望住部「尖卡」。

上咗25或30歲嘅男車迷，可能都會見過汽車海報（Poster），喺日本Yahoo Auction同ebay，成日可以見到大量由車廠印製嘅中古poster，呢啲poster好多都係廠方派畀各地汽車代理、試過車嘅準買家，又或者係喺陳列室派，尺碼、印製數量同流通程度都唔同，例如有啲可能只係印百零二百張，十幾二十年後，喺地球上仲可以遇到或有機會bid到嘅，機會同中六合彩二、三獎差唔多。

呢啲海報，開價或最終成交價，由百零蚊到二、三千蚊，以至上萬蚊都有，視乎罕有矜貴程度，仲有，賣家會唔會扮買家同你鬥bid扯高成交價。 

近一年有張係本田（Honda）S2000喺1999年至2005年巿務推廣活動期間印製嘅超大poster放盤，當時嘅宣傳口號為「Do You have a Honda？」，後來，賣家喺宣傳活動完結後，從接近本田嘅人士中取得少量數目。

http://page8.auctions.yahoo.co.jp/jp/auction/h203748687

Poster長146cm x 103cm，146cm？差不多1.5米，相當巨型，高都有1米，成張相，係一部用wide鏡影住嘅S2000車頭，掛住酷似來自歐洲大陸嘅車牌，如果你鍾意嘅汽車海報，要彩色嘅，一定要正正經經成部車「dut」喺度，咁呢張一定唔啱你，但講feel，講氣氛，呢張相當唔錯，趁住仲係王老五狀態，又或另一半唔理你點樣玩物喪志，值得諗諗。唔啱feel，仲有張AP1喺2003年facelift之後嘅poster，長103cm x 闊73cm。

http://page9.auctions.yahoo.co.jp/jp/auction/k154277561

起bid價30000日圓，折合約$2200港元，據有幫襯開呢位seller嘅本地bidder講，應該可以「一口價，無人爭」成交。 

遲啲再同大家講吓買咗啲poster返香港，點樣裝裱，點樣收藏，仲有啲咩要注意，同埋裝裱框架目前咩價位。