日產（Nissan）同三菱（Mitsubishi Motors）昨日（12/5）正式達成收購協議，日產出資2370億日圓購入三菱34%股份，五月底正式簽署文件，今年底完成有關程序。

有從事日本重工業發展研究嘅專家認為，隨住日產成為三菱汽車其中一個最大股東，再加上日本政經界嘅傳統玩法，三菱汽車耗油數字造價一事將會大事化小，畢竟好多「那些年」喺R & D或決策層擔當要職嘅「大佬」，都已經年邁或身故多年，即使行政機關要向三菱汽車處分，極其量都係罰款或向個別人士發出嚴重警告。結果大有「唯威喂拆掂佢」嘅味道。

日產CEO Carlos Ghosn昨日（12/5）喺發布會上公布收購三菱後嘅近未來發展計劃

雙方昨日均表示，日產收購三菱汽車之後，雙方會喺採購、底盤共用有合作，而三菱仍會保留其R & D部門。外界估計日產在是次交易中最大得益，在於可以利用三菱喺東南亞嘅生產線及銷售網絡，降低成本並增加其中下格汽車嘅產量及銷量，另外，三菱喺電動汽車（EV）嘅多項嶄新，但冇資金商品化嘅發明，例如wheel-hub motor，好大機會會喺未來嘅日產電動車出現。

Carlos Ghosn提及今年秋季將有一款全新小型Hybrid車面世，

並會配備名為e-Power system嘅技術，唯未有講及技術詳情

講返未來幾個月，日產行政總裁Carlos Ghosn表示將今秋推出一款全新小型嘅Hybrid車，佢所指嘅「小型Hybrid車」，有人估計係配備Range Extender嘅Note EV。Note EV車上裝有一副1.2公升3汽缸引擎，但引擎嘅角色只係一副增程器（Range Extender），佢唔會直接驅動車軸，而係為Note EV嘅電池組充電。有消息指，Note EV嘅摩打輸出數字與Leaf相同，最大馬力都係109匹，峰值扭力25.9kgm。暫時未有消息提到Note EV喺增程器配合下嘅最長續航力有幾多，但400km左右，一定唔難。預計售價約為250萬日圓，並以混合動力（Hybrid）形式登記出牌，因為凡有Range Extender之車輛，均不能被視作純電動汽車。

消息指Note EV嘅增程器將配一副1.2公升3汽缸引擎，圖為Note嘅1.2公升直三超級增壓引擎