平治（Mercedes-Benz）開篷車多fans，尤其係R129型SL及A124*型開篷車，因為兩款車外形好襟睇，只要保養得宜，又能保持到原汁原味，揸出嚟依然咁有魅力。

聽過唔少例子，有買家因為N咁多個原因賣咗部A124，後來又心思思想買返部，點知睇極都唔啱心水，就周圍同人講：「我嗰時部124開篷好靚㗎！」「我部車咁靚，真係唔捨得賣，好多人畀好高價我都冇理佢哋。」

既然係咁愛，咁點解最後賣咗呢？

所以，車賣咗，原因講一次就夠。日講夜講，遇人遇鬼都講同一番話，人哋會覺得你係有病，係癲。

A124 Cabriolet，又被稱為E-Class Cabriolet，其實一睇佢車身線條就知佢系出E-Class，點解叫到咁複雜咁論盡？因為E-Class呢個名，喺1993年先開始使用，在此之前，大家都係直接叫300 CE-24 Cabriolet，又或者叫「124開篷」就算。

A124 Cabriolet喺1991年9月嘅德國法蘭克福車展發表，今年係面世25周年，呢款車屬於標準四座位開篷車，唔係2+2，用當年嘅標準，後座有合理乘坐及雙腿伸展空間，平治再對上一款四座位開篷車，已經係60年代嘅W111型280 SE Cabriolet及280 SE 3.5 Cabriolet，呢兩個級別一直生產至1971年停產。

A124 Cabriolet採用當時流行嘅電動軟篷，成個篷連活動組件約43公斤，收起篷只佔去行李艙約80公升空間，以當年標準，算好慳位。另外，喺靠近椅背頂端內藏自動彈出保護桿，當車身受到猛烈震盪、撞擊或傾側至若干水平，保護桿立即升起，以防車輛翻側時，後座乘客頭顱著地引致傷亡。

早期嘅A124 Cabriolet只有一個級別，300CE-24，配3公升直6 雙頂凸輪軸24活瓣引擎，最大馬力220匹/6400rpm，總產量6343部，至93年停產。 

1993年6月起，引擎選擇多咗，包括E 200直四引擎（136匹）、E 220直四引擎（150匹）、E320六汽缸引擎（220匹）及E 36 AMG六汽缸引擎（272匹）。

A124 Cabriolet生產期直至1997年，總產量33,952部，當中有15,380部屬四汽缸級別，其餘配六汽缸引擎。

*124車系嘅W代表四門房車、C代表轎跑（Coupe）、S代表旅行車（Estate）、V代表長陣版房車